Saturday, November 28

ऋणले निम्त्याएको विनाश: जसले आत्महत्या मात्र गरेनन् श्रीमतीसँगै छोरा र कुकुरको समेत हत्या गरे

September 13, 2020 471

भक्तपुर । मध्यपुर थिमि नगरपालिका–९, निकोसेरामा वर्षदिन अघि निर्माण गरेको चार कोठाको चार तले नयाँ घर घरधनी ४० वर्षीय सुदीप अधिकारीको परिवारका लागि अभिशाप बन्यो । सो घर बनाउँदा अधिकारी परिवारलाई कृषि विकास बैंकको २३ लाख र ससुरालीको दुई लाख गरी जम्मा २५ लाख रुपियाँ ऋणभार परेको थियो । ऋण चुक्ताका लागि बैंक तथा ससुरालीबाट कुनै दबाब थिएन ।

कोरोना महामारी भित्रिएसंँगै मुलुक बन्दाबन्दीमा फसेपछि अधिकारी दम्पती र छोराबीचको पारिवारिक कलह दिन प्रतिदिन बढ्दै जाँदा ऋण जोहो तथा दुःख गरी बनाइएको नयाँ घर अभिशाप बनेको तथ्य खुुल्दै गएको प्रहरीको दाबी छ । ऋण तिर्न सक्ने आर्थिक विकल्प साँघुुरो भयो । प्रहरीका अनुुसार तनावका कारण अधिकारीले ‘सेल्फोस’ नामक मुसा मार्ने विष सेवन गरी आत्महत्या मात्र गरेनन् श्रीमतीसँगै यसै वर्ष एसइई उत्तीर्ण गरेको छोरा र कुकुरको समेत हत्या गरेका छन् ।
महानगरीय प्रहरी अपराध महाशाखाका प्रमुख दीपक थापाले अनुसन्धानका क्रममा अधिकारीले नै श्रीमती ३६ वर्षीया सम्झाना र १५ वर्षीय छोरा सुशान्त र एउटा कुकुर हत्या गरेको तथ्य प्रमाण फेला परेको दाबी गरे ।

यो घटनामा नितान्त पारिवारिक कलहबाट भएको दाबी उनको छ । घर बनाउँदा लागेको ऋण तिर्न नसक्दाको तनावसँगै मदिराको लत र पारिवारिक कलहबाट विछिप्त (डिप्रेसन) भएर अधिकारीले यस्तो कठोर निर्णय गरेको हुन सक्ने प्रहरीको भनाइ छ । कोरोना महामारीका कारण लामो समयसम्म बन्दाबन्दी लागू भयो । अधिकारीको औषधि पसलको जागिर पनि छुटेको थियो । अधिकारीको घरको भुइँ तलामा रहेको किराना पसलबाट बैंकको ब्याज तिर्न सक्ने अवस्था छैन ।

हत्या २४ गते राति
“श्रीमती र छोराको हत्या गत २४ गते राति गरेको देखिन्छ” थापाले भने, “त्यसको १८ घण्टापछि भदौ २५ गते साँझ विष सेवन गरी अधिकारी आफैँले आत्महत्या गरेका हुन् । प्रहरीले घर नजिकै धानखेतमा फालिएको सेल्फोस विषको दुईवटा बोतल फेला पारेको छ । ’’

अधिकारी मृत अवस्थामा भेटिएको भान्सा कोठामा पनि विष पोखिएको फेला परेको छ । घटनास्थल अनुसन्धान र मेडिकल रिपोर्टबाट पनि अधिकारीले श्रीमती र छोराको हत्यापछि विष सेवन गरी आत्महत्या पुष्टि भएको छ । प्रहरीका अनुसार अधिकारीले आ–आफ्नै कोठामा सुतेको अवस्थामा सुरुमा छोराको र त्यसपछि श्रीमतीको हत्या गरेका हुन् ।

नियमित मदिरा सेवन गर्ने भएकाले बुवा र छोराबीच सर्वसाधारणले देख्ने गरी झगडा भइरहन्थ्यो । प्रत्यक्षदर्शीको भनाइ उध्दृत गर्दै महाशाखा प्रमुख थापाले थपे, “सोही रिसले होला छोराको घाँटी रेट्नुका साथै टाउकोको चार ठाउँमा दाउरा प्रहार गरेको हुुनसक्छ । ’’

श्रीमती र छोराको हत्या गरेको पछिल्लो बिहान केही समय किराना पसल खोलेका थिए । सोही साँझ विष सेवन गरी अधिकारीले आत्महत्या गरेको भनाइ प्रहरीको छ । छोराको मृत शरीरमाथि रामराम लेखेको र श्रीमतीको शरीरमाथि बर्को ओडाइ दिएका थिए । शुक्रबार दिउँसो फोन नउठेपछि मृतक अधिकारीका भाइबुहारी मासु बोकेर दाजुभाउजू भेट्न साँझ ५ बजे घरमा पुग्दा उक्त हत्या घटना सार्वजनिक भएको हो । अधिकारीको कान्छो भाइ सशस्त्र प्रहरी बलमा आबद्ध छन् ।

घर बनाउँदा लागेको ऋण त्यसमाथि नियमित मदिरा सेवन गर्ने भएकोले श्रीमती र छोराले अधिकारीलाई कराउने गरेको हुन सक्ने भनाइ अनुसन्धानमा संलग्न प्रहरीको छ ।

आजको गोरखापत्र दैनिकबाट

प्रतिकृया दिनुहोस्